VTB (Azərbaycan) müştərilərinin rahatlığı üçün “Azadlıq” filialının iş qrafikini dəyişib

2016-05-17

Bank VTB (Azərbaycan) müştərilərinin rahatlığı və xidmət keyfiyyətinin artırılması üçün paytaxtdakı filiallardan birini yeni iş qrafikinə keçirib. Belə ki, 16 may 2016-cı ildən etibarən bankın “Azadlıq” filialı 12-saatlıq və 6-günlük iş rejimində işləyir. Yeni iş rejiminə əsasən, filial müştərilərə həftə içi saat 09:00-dan 21:00-dək, şənbə günləri isə 10:00-dan 19:00-dək xidmət göstərəcək.

Yeni formatda “Azadlıq” filialı öz müştərilərinə əvvəl göstərdiyi xidmətləri təqdim etməyə davam edəcək. Bura valyuta mübadiləsi, təcili pul köçürmə sistemi üzrə vəsaitin ödənilməsi və göndərilməsi, mədaxil əməliyyatları, hesabların açılması, plastik kartların sifarişi və verilməsi, ödəmə tapşırıqlarının qəbulu, hesablar üzrə çıxarışların verilməsi, kredit üçün sifarişlərin qəbul edilməsi, məsləhətlər üzrə bütün xidmət kompleksi daxildir.

“Əksər müştərilər məşğul olduqları üçün iş saatlarında banka gələ bilmir. Məhz bunun üçün biz filiallardan birinin iş rejimini uzatmaq qərarına gəldik. İndi bank əməliyyatları üçün müştərilər işdən icazə almalı olmayacaq”- deyə, bank VTB (Azərbaycan)-ın idarə heyətinin sədri Yuri Yakovlev bildirib.